O Concello de Portas convértese en pioneiro no fomento do uso de enerxías alternativas ao emprego de combustibles fósiles tras instalar na Rapeira un posto de recarga semirápida para automóviles, bicicletas eléctricas e patinetes. Polo momento, este servizo terá un carácter gratuíto e autoxestionado polos usuarios co que o Concello pretende ofrecer unha alternativa medioambiental sostible.

O custe total do investimento foi de 10.836,23 euros e contou cunha achega de 9.687,59 euros provinte do Fondo Europeo Agrícola de Desenvolvemento Rural (Leader) que permite contar con estas instalacións habilitadas a través de dúas prazas de aparcamento sinalizadas en verde no chan e que poderán dar servizo a dous automóbiles ao mesmo tempo cunha potencia máxima de 22 Kw/hora.

Segundo manifestou o alcalde de Portas, Ricardo Martínez, “esta “electrolinera” terá unha capacidade de recarga de máxima de 22 Kw/hora e permitirá que varios usuarios poidan utilizar ao mesmo tempo este servizo de xeito gratuíto. A nosa intención é ofrecer nun sitio xeoestratéxico, como é A Rapeira (nas proximidades do campo de fútbol, o centro de saúde, o consistorio e a Casa da Cultura) un punto de recarga para facilitar que aquelas persoas que decidiron apostar por outras enerxías alternativas aos combustibles fósiles teñan posibilidades de repostar”.

Para Ricardo Martínez “o ideal é que a xente use con respecto e racionalidade o servizo que, de momento será gratuíto, e que poidan achegarse tanto veciños como visitantes a repostar comodamente mentras fan as súas compras, van ao médico, a unha actividade deportiva, etc. Ao ser un servizo pioneiro seguro que tamén se achegarán visitantes ao noso Concello con vehículos destas características e fomentarase de xeito indirecto tamén o turismo xa que non todo o mundo dispón deste servizo que é cada vez máis demandado por aquelas persoas que apostaron por algún tipo de vehículo eléctrico”, indicou Martínez.

UN CONCELLO COMPROMETIDO COA SOSTENIBILIDADE, QUE APOSTA POLO AFORRO ENERXÉTICO E O RESPECTO MEDIOAMBIENTAL

O alcalde de Portas lembrou que o municipio está levando a cabo nos últimos tempos unha aposta clara e decidida polo medio ambiente, baseado en cumprir cos obxectivos do Pacto de Alcaldías polo Clima e a Enerxía Sostible (PACES) que prevé unha redución do 30% das emisións contaminantes. Así, o Concello levou a cabo un ambicioso proceso de substitución das luminarias tradicionais por outras Led de baixo consumo en practicamente todo o municipio, optimizouse a caldeira de pellets no complexo sociocultural da Azucreira e se instalaron placas solares que abastecen de enerxía aos edificios de titularidade municipal.

“O futuro está no uso racional e sostible da enerxía en perfecta harmonía co medio ambiente. Todos, na medida das nosas posibilidades, temos que contribuir a loitar contra o cambio climático e por facer máis habitable medioambientalmente o noso planeta e o noso espazo máis próximo”, indicou o alcalde de Portas quen insistiu en que “esta é unha experiencia pioneira na que temos depositadas moitas ilusións e agora agardamos un uso responsable da veciñanza e un aproveitamento racional deste recurso que, inicialmente, poremos a disposición do público dun xeito gratuíto”, concluiu Ricardo Martínez.

O Concello de Portas solicita a máxima colaboración veciñal para evitar que se sigan utilizando de xeito inadecuado os contedores de lixo do municipio. Nos últimos días levan aparecendo de xeito reiterado material de obras, entullo, anacos de mangueira eléctrica, etc. elementos que non se poden depositar nos recipientes de recollida de residuos sólidos urbáns.

Ante esta situación, o Concello advirte de que se tomarán medidas  contra os infractores xa que a proliferación de residuos inadecuados están provocando serias avarías no camión de recollida de lixo que ao accionar os sistemas de empacado resultan seriamente danados.

Por outra banda, o Concello de Portas porá en coñecemento da Garda Civil o achádego de restos de mangueiras eléctricas seccionadas que poideran corresponder ao material substraído recentemente no municipio co fin de practiquen as probas pertinentes para tratar de comprobar a súa procedencia e determinar tamén si están relacionadas ou non con ese roubo.

O Concello de Portas leva meses renovando os contedores e optimizando o servizo de recollida de lixo co fin de ter atendida do mellor xeito posible toda a demanda que en materia de residuos se poida producir no municipio polo que reitera a súa petición de colaboración veciñal para que esta se realice de xeito adecuado.

O Concello de Portas celebrou con gran éxito de participación o “XXIX Xantar da Terceira Idade” celebrado no pavillón municipal de deportes e que contou coa presenza do alcalde, Ricardo Martínez, o director xeral de Maiores e Atención Sociosanitaria da Xunta, Antón Acevedo e os rexedores de Moraña, José Cela, e Meis, Marta Giráldez.

En torno ás 12:30 horas, do mediodía, a Banda de Música de Lantaño foi a encargada de abrir o evento e de ir entretendo ás persoas que ían chegando para asistir á misa de campaña oficiada polo cura párroco D. Román quen ensalzou a celebración do Día da Virxe do Pilar, patroa da Garda Civil, e tamén se referiu ao Día da Hispanidade.

Posteriormente, a Banda de Música de Lantaño ofreceu un concerto que serviu de entretemento para as persoa que se foron achegando para poder entrar no pavillón municipal de deportes, lugar habilitado e especialmente decorado para a ocasión e dar acubillo a este Xantar da Terceira Idade.

UN ACTO DE CONFRATERNIDADE E REENCONTRO VECIÑAL

A concelleira Chus Fontán e o alcalde, Ricardo Martínez, foron os encargados de darlle a benvida oficial aos comensais e agradecerlles a súa persenza neste acto de confraternidade e reecontro veciñal que se afianza como un dos eventos máis entrañables polo concurrido que resulta e pola participación de residentes en todas e cada unha das catro parroquias que compoñen o municipio.

A sobremesa completouse cunha gran queimada realizada por Ramón e a animación musical a cargo de Antonio Barros, cantante que triunfa no programa “Luar” da Televisión de Galicia.

O alcalde de Portas, Ricardo Martínez Chantada, acaba de regresar de Bulgaria onde participou na cidade de Nikopol nun irmandamento de municipios europeos, convidado pola Unión Europea dentro do programa “Project Europe for citizens. The citizes of Europe to build a better future”.

Portas formou parte da delegación española que, xunto a outros once países, acudiu a este encontro de irmandamento europeo promovido pola UE e na que o alcalde Ricardo Martínez tivo a oportunidade de dirixirse ao público presente e ás autoridades búlgaras, así como aos representantes dos outros concellos eurpeos, para promocionar os atractivos turísticos do municipio, vencellado ao Camiño de Santiago, e tamén o enoturismo e a cultura do viño, moi aprezada e valorada no resto de Europa.

Ricardo Martínez participou en varios grupos de traballo especialmente orientados á promoción turística e á viticultura, como os dous elementos máis salientables e de interese para Portas neste primeiro encontro europeo no que participa o municipio, representando a España. Tamén asinou un protocolo de boa veciñanza europea e de irmandamento cos pobos de Europa.

UN IRMANDAMENTO PARA IR CONSTRUÍNDO A EUROPA SOCIAL

Segundo manifestou Ricardo Martínez, “este irmandamento promovido pola Unión Europea está especialmente pensado para ir, pouco a pouco, promocionando unha maior integración entre os municipios europeos e para sementar a cultura da colaboración, o coñecemento mutuo, a solidariedade e tamén a promoción turística e económica dos distintos espazos europeos para incentivar a interrelación e a construción dunha Europa cunha visión un tanto máis social e non so económica, que tamén é interesante”, indicou o alcalde de Portas.

Nikopol é unha cidade do norte de Bulgaria, pertencente á provincia de Pleven, na marxe dereita do río Danubio a uns 4 quilómetros río abaixo da desembocadura do río Osam. Esténdese ao pé de cantís empinados ao longo do Danubio e dun estreito val. Ten unha poboación que ronda os 4.000 habitantes e está conformada por un crisol de culturas onde conviven cristiáns ortodoxos, otomanos e musulmáns. Bulgaria ingresou na Unión Europea no ano 2007, pero, de feito, aínda conserva a súa moeda nacional, o “Lev” búlgaro ou a “Leva”. Está previsto que adopte o euro en xaneiro do 2024.

Despois desta experiencia, está aberta a porta a participación do municipio e máis iniciativas europeas que teñan como protagonistas a Portas e tamén aos seus veciños e veciñas xa que durante esta visita o alcalde, Ricardo Martínez, avanzou coas autoridades europeas en máis programas e iniciativas que poden redundar dun xeito activo na promoción turística e social de Portas co apoio e a financiación da Unión Europea.

O ALCALDE DE PORTAS PARTICIPAN EN NIKOPOL (BULGARIA) NUN IRMANDAMENTO DE MUNICIPIOS EUROPEOS

Ricardo Martínez asinou un protocolo de boa veciñanza europea e e aproveitou a ocasión para promocionar os atractivos turísticos do municipio, vencellado ao Camiño de Santiago e á viticultura

Portas, 10 de outubro de 2022

O alcalde de Portas, Ricardo Martínez Chantada, acaba de regresar de Bulgaria onde participou na cidade de Nikopol nun irmandamento de municipios europeos, convidado pola Unión Europea dentro do programa “Project Europe for citizens. The citizes of Europe to build a better future”.

Portas formou parte da delegación española que, xunto a outros once países, acudiu a este encontro de irmandamento europeo promovido pola UE e na que o alcalde Ricardo Martínez tivo a oportunidade de dirixirse ao público presente e ás autoridades búlgaras, así como aos representantes dos outros concellos eurpeos, para promocionar os atractivos turísticos do municipio, vencellado ao Camiño de Santiago, e tamén o enoturismo e a cultura do viño, moi aprezada e valorada no resto de Europa.

Ricardo Martínez participou en varios grupos de traballo especialmente orientados á promoción turística e á viticultura, como os dous elementos máis salientables e de interese para Portas neste primeiro encontro europeo no que participa o municipio, representando a España. Tamén asinou un protocolo de boa veciñanza europea e de irmandamento cos pobos de Europa.

UN IRMANDAMENTO PARA IR CONSTRUÍNDO A EUROPA SOCIAL

Segundo manifestou Ricardo Martínez, “este irmandamento promovido pola Unión Europea está especialmente pensado para ir, pouco a pouco, promocionando unha maior integración entre os municipios europeos e para sementar a cultura da colaboración, o coñecemento mutuo, a solidariedade e tamén a promoción turística e económica dos distintos espazos europeos para incentivar a interrelación e a construción dunha Europa cunha visión un tanto máis social e non so económica, que tamén é interesante”, indicou o alcalde de Portas.

Nikopol é unha cidade do norte de Bulgaria, pertencente á provincia de Pleven, na marxe dereita do río Danubio a uns 4 quilómetros río abaixo da desembocadura do río Osam. Esténdese ao pé de cantís empinados ao longo do Danubio e dun estreito val. Ten unha poboación que ronda os 4.000 habitantes e está conformada por un crisol de culturas onde conviven cristiáns ortodoxos, otomanos e musulmáns. Bulgaria ingresou na Unión Europea no ano 2007, pero, de feito, aínda conserva a súa moeda nacional, o “Lev” búlgaro ou a “Leva”. Está previsto que adopte o euro en xaneiro do 2024.

Despois desta experiencia, está aberta a porta a participación do municipio e máis iniciativas europeas que teñan como protagonistas a Portas e tamén aos seus veciños e veciñas xa que durante esta visita o alcalde, Ricardo Martínez, avanzou coas autoridades europeas en máis programas e iniciativas que poden redundar dun xeito activo na promoción turística e social de Portas co apoio e a financiación da Unión Europea.

A Xunta de Galicia, a través da Consellería do Medio Rural, está a investir máis de 100.000 euros na mellora de pistas rurais nos lugares de Cachada, Almirante e Tras do Río, no Concello de Portas, cun financiamento ao abeiro do Plan Marco de mellora de camiños municipais de acceso a parcelas agrícolas e do Plan de Infraestruturas Rurais (PIR) correspondente ao presente ano 2022.

Por este motivo, o delegado territorial da Xunta en Pontevedra, Luis López, acompañado polo alcalde de Portas, Ricardo Martínez, e polo xefe territorial do Medio Rural, Antonio Crespo, realizou esta mañá unha visita de supervisión ao vial entre Almirante e Tras do Río, cuxa mellora xa está rematada e á que se dedicaron 54.000 euros do Plan Marco, e tamén á contorna do camiño entre Cachada e Portas, na que se investiron case 49.000 euros do PIR.

Estas actuacións consistiron principalmente na renovación do firme, que se atopaba deteriorado en varios puntos, o ensanchamento da plataforma naqueles espazos onde era necesario e había dispoñibilidade de terreos para a súa ampliación e outras pequenas melloras que incluíron a construción dalgún muro de contención ou a reposición de servizos.

“É fundamental realizar un apoio constante aos concellos rurais para soster as súas infraestruturas viarias, tal e como facemos todos os anos dende a Xunta, para mellorar a mobilidade das súas aldeas e parroquias e facilitar os labores agrogandeiros que, no caso dun municipio como Portas, son fundamentais para a súa economía, na que os sectores primario e da vide teñen moito peso”, explicou o representante autonómico, que salientou que a Xunta incrementou este ano o Plan Marco para este concello en case un 17% e o PIR en preto dun 3%.

Deste xeito, o Concello de Portas ten recibido, ao longo do último lustro, máis de 467.000 euros da Consellería do Medio Rural para o acondicionamento das súas vías municipais de carácter rural a través do citado Plan Marco de mellora de camiños municipais de acceso a parcelas agrícolas e do Plan de Infraestruturas Rurais (PIR). Con estas achegas, favoreceuse a modernización de ata unha quincena de pistas pertencentes a unha decena de parroquias ou lugares do termo municipal, como Rapeira, Currás, Barreira, Portas, Briallos, Lantaño, Casal, Torre ou Romai, ademais das beneficiarias das partidas do presente ano.

O Concello de Portas recibiu unha subvencións para a Sinalización do Patrimonio-Cultural aos Concellos da Provincia de Pontevedra – Liña B da Deputación de Pontevedra, pertencente á anualidade 2021 de 2.855,60 euros.

Esta axuda permite seguir sinalizando os distintos elementos pertencentes ao patrimonio cultural, etnográfico e histórico do que dispón o municipio.

A UNED de Pontevedra en colaboración co Concello de Portas pon en marcha na Aula Universitaria ubicada na Casa da Cultura deste municipio unha serie de clases de reforzo educativo para obter o título da ESO.

Este programa vai dirixido a maiores de 18 anos que non teñen o título de graduado en ESO co obxectivo de conseguir a mencionada titulación. Preténdese axudar nas distintas materias incluídas nos tres ámbitos (ámbito científico-tecnolóxico, ámbito da comunicación e ámbito social) dos que consta a proba para obtención do título da ESO.

Programa formativo:

Luns: 19:00 – 22:00h ámbito da comunicación

Martes : 19:00 – 22:00 ámbito social

Mércores: 19:00 – 22:00 ámbito científico-tecnolóxico

Xoves: 19:00 – 22:00 ámbito científico-tecnolóxico

Venres: 19:00 – 22:00 ámbito científico-tecnolóxico

O Concello de Portas acaba de facer público un bando no que se recolle a convocatoria das Axudas Municipais o Apoio ao Estudo para o curso escolar 2022-2023. O prazo para a súa solicitude está aberto ata o 4 de outubro e poderán acoller as familias que estean empadroadas no municipio.

Os gastos subvencionables a través desta liña de axudas postas en marcha polo Concello de Portas son os seguintes:

GASTOS SUBVENCIONABLES:

1.- Material escolar funxible(libretas, lapis, folios, material de papelería non reutilizable e/ou material de manualidades) para o alumnado da segunda etapa de educación infantil, educación primaria e secundaria obrigatoria..

2.- Libros de texto en educación infantil.

3.- Material informático para alumnado de primaria e secundaria (pincho usb, tablet, ordenadores portátiles/mesa, ratos, teclados e/ou impresoras).

4.- Vestiario básico para alumnado da segunda etapa educación infantil (mandilón)

Máis información no seguinte enlace https://portas.sedelectronica.gal/ e nas oficinas do Concello de Portas.

A directora xeral de Administración Local, Natalia Prieto, visitou hoxe xunto co delegado territorial da Xunta en Pontevedra, Luis López, o concello de Portas para coñecer as actuacións de mellora desenvolvidas na pista deportiva do Mondoiro, na parroquia de Lantaño. As obras, realizadas ao abeiro da Orde de infraestruturas de uso público da Xunta, supuxeron unha achega de 33.764 euros. Na súa visita estivo acompañado polo alcalde, Ricardo Martínez e a concelleira, María Jesús Fontán.

A través da iniciativa ampliouse a plataforma existente ata os 44×24 metros, coa limpeza e preparación do terreo, e executouse un novo pavimento de formigón, co trazado das liñas divisorias do campo. Ademais, instaláronse porterías antivandálicas para fútbol sala con canastra de baloncesto e unha rede fixa de protección da pista deportiva de catro metros de alto.

Na súa visita a directora xeral comprobou o resultado das actuacións e salientou a importancia de apoiar as administracións locais en proxectos coma este, que lle facilitan a práctica deportiva ao conxunto da poboación e, sobre todo, lles ofrecen aos máis novos un lugar de encontro e esparaxemento.

Segundo apuntou, este é o principal obxectivo da Orde infraestruturas de uso público da Xunta, facilitarlles ás administracións locais e á cidadanía unhas axeitadas infraestruturas, dotacións, instalacións e equipamentos vinculados á prestación de servizos municipais.  Coas axudas búscase tamén garantir un equilibrio entre o medio rural e o urbano, o interior e a costa, que permita tanto o desenvolvemento económico da totalidade do territorio galego como unhas óptimas condicións de vida da cidadanía con independencia do lugar de residencia. 

A Orde de infraestruturas de uso público destínase a concellos de menos de 30.000 habitantes para mellorar as infraestruturas, dotacións, instalacións e equipamentos vinculados á prestación de servizos municipais. Neste ano, o orzamento global previsto para as actuacións ascende a 3,5 millóns de euros.

Desde a creación da orde, en 2009, o Goberno galego mobilizou máis de 44 millóns de euros para financiar 1.480 proxectos en concellos de toda Galicia, dos que 125 se executaron o pasado ano e 108 serán executados este ano.

A medida forma parte das diferentes liñas de axudas a prol das administracións locais. Segundo sinalou Natalia Prieto, o Concello de Portas recibiu nos últimos anos preto de 500.000 euros para diversas actuacións tanto en infraestruturas como de protección e mellora ambiental.

O “Mercado das Pulgas” volve ao concello de Portas o vindeiro domingo 11 de setembro pola mañá diante da Casa de Cultura. Este mercadillo de segunda man achega todo tipo de artigos e produtos para que o público poida mercalos e darlles outra oportunidade.

Esta actividade está organizada por “Portas sostible” e o Concello de Portas e pode participar de xeito gratuíto quen queira cun stand previa solicitude chamando ao teléfono 986 53 69 25.

Anímate e participa!!!