O Concello de Portas súmase ás distintas actividades que de xeito oficial se están desenvolvendo para conmemorar o Día Internacional da Atención Temperá, que se celebra o 16 de xuño.

Pero, que é a Atención Temperá?
A atención temperá é un conxunto de intervencións, técnicas e ferramentas dirixidas a persoas de entre 0 e 6 anos que permiten responder, de forma temperá, a calquera necesidade transitoria ou permanente de nenos e nenas con trastornos no seu desenvolvemento. Noutras palabras, podemos dicir que permiten anticiparnos ao tratamento de calquera trastorno evolutivo, así como anticiparnos a que ocorra este trastorno en persoas predispostas a padecelo.

Estas técnicas son esenciais en numerosos campos do coñecemento, como na Educación, na Psicoloxía ou no Traballo Social. Grazas a elas, moitos nenos e nenas poden levar unha vida normal, aínda padecendo determinados trastornos que, hai uns anos, non lles permitirían ter unha vida normal. Por iso, é fundamental na vida de moitos nenos e nenas e dos seus familiares.

O Concello de Portas acaba de publicar o listado de nenos e nenas inscritos nas actividades de verán 2022 baixo o título “CAMIÑANDO XUNTO@S”. Teñen preferencia de inscrición os rapaces e rapazas que estean empadroados no concello de Portas.

Nestas actividades participarán os nenos e nenas con idades comprendidas entre 3 e 14 anos. O número máximo de prazas é de 55 no mes de xullo e 30 en agosto.

O prezo por participante e mes será de 50 euros (no caso de dous irmáns, 80 euros) e 35 euros a quincena. Os non empadroados terán que abonar 70 euros/mes (dous irmáns 112 euros) e 45 euros a quincena. Aplicarase un desconto do 40% para as familias numerosas.

CONSULTA AQUÍ O LISTADO DE INSCRITOS:

O Concello de Portas acaba de editar un Bando que rexirá as solicitudes dos permisos para realizar as fogueiras de San Xoán os días 23 e 24 de xuño.

Aqueles veciños que queiran facer unha fogueira deberán solicitar unha autorización no Consistorio antes do mércores 22 de xuño debendo achegar unha copia do DNI, así como indicar a referencia catastral da finca onde se vai proceder a celebrar a Fogueira de San Xoán.

Tamén poderá presentar a solicitude a través da sede electrónica do Concello de Portas:

É imprescindible que se cumpran as medidas medioambientais e de prevención establecidas.

A Fundación Amigos de Galicia, en colaboración co Concello de Portas, organiza o programa Mellor Acompañados a través do cal pon en marcha un curso GRATUITO de tres días onde se pretende que as persoas maiores se desenvolvan nas novas tecnoloxías para poder acceder as xestións dixitais tan necesarias na actualidade. 

• – Maiores de 65 anos.
• – Días 28-29-30 de Xuño.
• – Horario: 09:30- 13:00.
• – Lugar: Casa de Cultura do Concello de Portas.
• – Prazas: máximo 15 prazas (é necesario xuntar un grupo de 10 persoas para levar a cabo o curso). 
• – Prazo de inscrición: ata o 22 de xuño.

Para máis información no teléfono 662 620 397 (EDUCADORA FAMILIAR). 

Ao abeiro das medidas sinaladas no Pacto de Estado contra a Violencia de Xénero, financiado con cargo aos créditos recibidos do Ministerio de Igualdade, Secretaría do Estado de Igualdade e contra a Violencia de Xénero, o Concello de Portas organiza dúas sesións de orientación laboral desde unha perspectiva de xénero co alumnado de 3º e 4º da ESO no Colexio C.P.I. Domingo Fontán, coa finalidade de traballar a prevención e a loita contra a discriminación nun futuro laboral, facendo especial fincapé no conxunto de factores e barreiras laborais e sociais que encontran as mulleres á hora de acceder a ocupacións masculinizadas.

Hoxe, 31 de maio, conmemórase en todo o mundo o Día Mundial sen tabaco. Dende os concellos de Cuntis, Barro, Campo Lameiro, Moraña e Portas, a través do Proxecto de prevención das condutas adictivas, queremos sumarnos á Organización Mundial da Saúde (OMS) , co fin de resaltar os riscos asociados ao tabaquismo; tanto para a saúde, como noutros ámbitos, e avogar por políticas eficaces para reducir o inicio no seu consumo e fomentar o seu abandono entre as persoas fumadoras.

Resaltamos o lema do  Día Mundial Sen Tabaco deste ano 2022, que se centra na protección do medio ambiente.

“ENVENENA O NOSO PLANETA#TABACCO EXPOSED”

A continuación adxúntase o Manifesto do Día MUNDIAL SEN TABACO 2022, así como o cartel da campaña da OMS para conmemorar este día.

O Concello de Portas abre o prazo para inscribir aos nenos e nenas nas actividades de verán 2022 baixo o título “CAMIÑANDO XUNTO@S”. Terán preferencia de inscrición os rapaces e rapazas que estean empadroados no concello de Portas.

Poderán participar nestas actividades os nenos e nenas con idades comprendidas entre 3 e 14 anos. O número máximo de prazas serán de 55 no mes de xullo e 30 en agosto.

O prezo por participante e mes será de 50 euros (no caso de dous irmáns, 80 euros) e 35 euros a quincena. Os non empadroados terán que abonar 70 euros/mes (dous irmáns 112 euros) e 45 euros a quincena. Aplicarase un desconto do 40% para as familias numerosas.

O PRAZO DE INSCRICIÓN REMATA O 10 DE XUÑO.

As solicitudes pódense recoller no rexistro do Concello de Portas ou ben na Sede electrónica do Concello (Taboleiro de Anuncios).

https://portas.sedelectronica.gal/info.2?x=g9y-echPIZ1kAwXDjxd-feIqBwHyAY9s*FpK0NRllikJcspXU7jVV*5Z2BoLnOUmgfAgnxtB7TewQ9wFjwQbTcxKtjMpbK8bD3ReuFHRxgFXZatviZrRQsaR7e6qv6WI

O Concello de Portas estivo representado polo seu alcalde, Ricardo Martínez, no acto de presentación oficial da presente edición de PortAmérica que se desenvolverá durante os días 2, 3 e 4 de xuño, e que contou tamén coa presenza da presidenta da Deputación, Carmela Silva, o delegado da Xunta en Pontevedra, Luís López, e o alcalde de Caldas de Reis, Juan Manuel Rey, así como membros da organización do festival.

A programación comezará o 2 de xuño coas actuacións de Lori Meyers, Delaporte, A Randeeira Asasina, Muchachito Bombo Inferno, Natalia Lacunza, Rojuu, Cápsula, Fon Román e Grande Amore.O venres 3 será a quenda de WOS, Rozalén, Baiuca, Andrés Suárez, Instituto Mexicano do Son, Coque Malla, Arde Bogotá, Alice Wonder, A A Love You e The Parrots. E xa o sábado 4 os encargados de subirse ao escenario serán Nathy Peluso, Bizarrap, Xoel López, Viva Suecia, Mikel Erentxun, Depedro, Queralt Lahoz, Lisandro Aristimuño, Amparanoia, Dengue Dengue Dengue, Serbia, Dani e Frecha Valona.

Tamén se celebrarán un showroking, elemento característico deste festival. Nesta ocasión participarán preto de corenta chefs Estrella Michelín e 39 soles Repsol, baixo o comisariado de Pepe Solla. A organización ofrecerá liñas de autobuses desde as seis principais cidades galegas e está prevista que participen, como no resto dos Rías Baixas Fest, mozas mentorizadas dentro do empoderamento do talento musical feminino da provincia denominado ‘Descúbreas’, que ten en marcha a Deputación. Tamén se poñerán en marcha as campañas de igualdade, con repartición de material e a presentación dun audiovisual.

PortAmérica tamén forma parte dos Fest Galicia, da Xunta e así, Luís López, delegado territorial da Xunta en Pontevedra, destacou durante a súa intervención o traballo e esforzo que realizan os Concellos e os promotores musicais para que Galicia se atope na vangarda do panorama musical europeo neste ano Xacobeo. Precisamente PortAmérica será tamén a cita de arranque dos concertos previstos na programación do Xacobeo 22.

A previsión metereolóxica adversa motivou o aprazamento do Mercado das Pulgas, un mercadillo de artigos de segunda man que estaba previsto que se puxera a disposición do público este domingo 22 de maio na Rapeira, no espazo existente entre a Casa da Cultura e o Centro de Saúde.

A Asociación de Mulleres Rurais A Azucreira de Portas pudo conmemorar o seu 25 aniversario cun acto emotivo e un xantar de confraternidade no que participou o alcalde do municipio, Ricardo Martínez.

Despois de celebrar unha misa pola memoria das socias falecidas ao longo destes últimos anos, a presidenta da Asociación de Mulleres Rurais A Azucreira de Portas, Carmen Lago Diz, agradeceu o apoio e o traballo realizado polas súas compañeiras da xunta directiva ao longo de todos estes anos e tamén ás socias que coa súa participación activa nas actividades da entidade lograron que fora unha das máis dinámicas de todo o concello.

Carmen Lago alegrouse que despois da paréntese obrigada pola pandemia poideran celebrar agora o 25 aniversario que tivo que ser adiado con anterioridade por culpa das restricións da Covid-19. “Aínda que xa contamos con 27 anos de vida, por fin podemos celebrar como queriamos o 25 aniversario cun acto de reencontro entre todas as sociais e lembrando toda a nosa traxectoria”, indicou Lago Diz.

Despois da misa e antes do xantar de confraternidade proxectouse un vídeo coas imaxes que recollen gran parte da historia desta asociación ao longo dos seus 25 anos de vida onde se reflectiron excursións, cursos de informática, baile, manualidades, festas, etc.

Pola súa banda, o alcalde Ricardo Martínez felicitou á presidenta, Carmen Lago, e salientou o traballo asociativo e de dinamización do mundo rural feito por esta asociación ao longo de todos estes anos e brindoulles o seu apoio persoal e institucional como alcalde para que sigan desenvendo con garantías todas e cada unha das súas actividades como ata o de agora.