O Concello de Portas abre o prazo ata o 21 de xuño para poder solicitar permiso para facer fogueiras de San Xoán en fincas privadas. Os interesados deberán presentar unha instancia no Concello de Portas e achegar o DNI da persoa responsable xunto coa referencia catastral da finca onde se vai realizar a cacharela.

Este ano, por mor da Covid-19, as fogueiras de San Xoán só se poderán facer en terreos privados xa que está prohibido que se poidan realizar en espazos públicos.

Será imprescindible que se cumpran as medidas de seguridade para evitar incendios como sanitarias respectando en todo momento as indicacións aprobadas polas autoridades sanitarias en canto a aforo e medidas de autoprotección como a utilización de máscaras.

O Concello de Portas abre o prazo de inscrición para participar no programa “Acividades Verán 2021” que terán lugar durante os meses de xullo e agosto e coas que se pretende favorece-la conciliación entre a vida laboral e familiar e fomentar a socialización, a igualdade e as boas prácticas entre a mocidade. As actividades levaranse a cabo no CPI Domingo Fontán, de luns a venres en horario de 9 a 14 horas.

O número máximo de prazas habilitadas para esta actividade é de 55 no mes de xullo e de 30 no de agosto e terán preferencia os empadroados no municipio que traballen os seus dous proxenitores en verán, que traballe un ou otro tipo de situacións familiares.

Todos os nenos e nenas interesados en apuntarse ás actividades deberán recoller e entregar a solicitude no Rexistro do Concello de Portas ou ben por sede electrónica entre o 31 de maio e o 13 de xuño. O listado de admitidos será publicado o 14 de xuño e o prazo de matrícula extenderase do 15 ao 21 de xuño.

O prezo por mes para empadroados será de 50 euros (80 no caso de dous irmáns) e de 35 euros a quincena. Para os non empadroados a tarifa será de 70 euros ao mes (112 no caso de dous irmáns) e de 45 euros por quincena. Aplicarase un desconto, non acumulativo do 40% ás familias numerosas.

Para máis información os interesados poden dirixirse á Casa da Cultura, no teléfono 986 53 69 25 ou ao Concello de Portas, no teléfono 986 53 61 61 (ext. 1).

Un exitoso concerto no Auditoiro da Azucreira de Portas a cargo de Xoel López, Sabela e Alice Wonder serviu para celebrar o Día da Dona marcado polas restricións sanitarias derivadas da pandemia da Covid-19 que non impediron que máis dun cento de veciños e veciñas do municipio que tiveron a ocasión de retira-las súas entradas poideran disfrutar da boa música e rendirlle unha homenaxe a Concepción Pérez Iglesias e ás mulleres en xeral.

O Concello de Portas agradeceu a máxima colaboración e a calidade humana e profesional dos artistas así como a actuación de Esmerarte na organización do evento que foi do agrado de todo o público presente.

Por outra banda, o Concello quiso salienta-lo excelente comportamento e máxima colaboración amosada polo público presente que seguiu en todo o momento o protocolo sanitario e disfrutou dun concerto inesquecible que serviu de homenaxe ás mulleres de Portas nos tempos de pandemia.

Sobre o escenario do Auditorio da Azucreira de Portas estivo para homenaxear ao Día da Dona, Xoel López quen é sen dúbida un dos artistas máis solventes e representativos da escena independente iberoamericana. Recoñecido como Mellor Artista Nacional nos Premios da Música Independente de 2013 e con “Si Mi Rayo Te Alcanzara”, o álbum número 15 na súa traxectoria, publicouse o pasado 27 de novembro. La espina de la flor en tu costado, noveno corte do álbum e canción de cabeceira da serie de Netflix “El desorden que dejas”, posicionouse no número 2 do​ top mundial de procuras de​ Shazam.

Pola súa banda, Sabela é unha artista de especial sensibilidade que se deu a coñecer entre o público en xeral pola súa participación en Operación Triunfo OT-2018. Naceu no outono e creceu rodeada de mulleres e de música. En contacto coa natureza e o silencio. Escoitando o que necesita a terra. Empezou a soñar e a debuxar o seu camiño en Bravos. Unha viaxe vinculada á música, xogando cos instrumentos, tocando o clarinete, pintando sons e explorando. Máis adiante, axudando a outros a través da musicoterapia para atopar a súa voz para expresarse, descubriu cal é a súa. A​ exconcursante de OT 2018 chega a Portas co seu primeiro álbum: “Despedida”.

Tamén estivo en Portas a artista madrileña Alice ​Wonder que abriu os concertos da exitosa xira de presentación de “Mismo Sitio, Distinto Lugar” de​ Vetusta​ Morla, interpretou “La Apuesta” xunto a Guillermo Galván, canción orixinal da película “Qué te juegas – de Inés de León -, e forma parte da banda de Xoel López. O pasado 14 de maio publicou o seu novo álbum: “Que se foda todo o demais”, que presentou por primeira vez en Galicia con motivo do Día da Dona.​

Operarios municipais logran nestes instantes resolve-la avaría que deixara sen auga aos veciños da Estación.Despois dunha intervención a cargo de excavadoras os operarios municipais de Portas lograron localizar a rotura e aplicar unha solución urxente para poder subministrar auga da traída aos residentes na Estación.

Desde o Concello de Portas agradecemos a entrega e a profesionalidade dos operarios municipais e pedimos disculpas polas molestias ocasionadas.

Traballamos polos veciños e veciñas de Portas.

A Antigua Fábrica Azucreira de Portas converterase este sábado, 15 de maio, no terceiro escenario do proxecto ‘saborEarte’, unha iniciativa centrada na promoción turística do Camiño Portugués da Costa desde o punto de vista gastronómico.

Os  showcookings de ‘saborEarche’ céntranse nos produtos de proximidade e a historia das localidades nos que se celebran. Por ese motivo, a remolacha non podía deixar de estar presente na xornada de Portas.

E é que o fracaso na reconversión agrícola da zona, a comezos do século  XX, co obxectivo de aumentar a produción local de remolacha que proporcionase materia prima á fábrica azucreira, levou ao seu peche en 1903, tan só 4 anos despois da súa fundación.

Hoxe, a Azucreira de Portas é unha construción rehabilitada para o uso público e un excelente miradoiro ao val do Salnés, grazas á súa cheminea de 65 metros de altura.

Máis aló dos avatares da fábrica e do cultivo truncado de remolacha, Portas si se mantivo no tempo como un excelente produtor de viño albariño, D.OO. Rías Baixas. O concello conta con numerosas adegas locais, polo que esta cita de ‘saborEarche’ non podía deixar de incluír a presenza dos viños e produtores da zona.

O  showcooking tamén propoñerá receitas elaboradas con peixe de río, posto que a paisaxe de Portas está marcado polo percorrido do Umia.

Como xa sucedeu nos dous eventos precedentes -celebrados no Rosal e Soutomaior-, o  showcooking de Portas contará coa presenza do chef Miguel Mosteiro, de  Gastrolab Arousa, que nesta cita estará acompañado dos chefs Pepe Santos e Julio García. Tamén do fotógrafo Adolfo Enríquez, promotor do proxecto e encargado de realizar a fotografía gastronómica que conformará a exposición que percorrerá o Camiño Portugués da Costa durante o mes de xuño.

Despois de 12 anos de traballo intenso o alcalde Ricardo Martínez agradeceu o esforzo dos anteriores rexidores, Roberto Vázquez e Víctor Estévez, como iniciadores deste proceso que remata agora co seu impulso definitivo no seu primeiro mandato como presidente da Corporación Municipal de Portas.

Este Plan Xeral, que contou no acto de sinatura coa presenza da conselleira de Medio Ambiente, Territorio e Vivenda, Ángeles Vázquez, suporá un paso de xigante para que Portas poida fixar poboación e deseñar o seu crecemento futuro dun xeito responsable, sostible e equilibrado.

A ordenación urbanística das parroquias de Briallos, Portas, Lantaño e Romai estará marcada por este PXOM no que destacan:

-Máis de 45.000 m2 para espazos libres e zonas verdes e os máis de 100.000 m2 para equipamentos comunitarios.

-61 núcleos delimitados de 65.

-1.352 vivendas existentes.

-Capacidade máxima do solo urbano consolidado: 84 novas vivendas.

-Capacidade máxima do solo urbano non consolidado: 22 novas vivendas.

-Capacidade máxima do solo de núcleo rural tradicional: 415 novas vivendas.

-Capacidade máxima do solo de núcleo rural común: 902 novas vivendas.

-Capacidade máxima do solo urbanizable residencial: 100 novas vivendas.

-Capacidade máxima residencial do PXOM: 703 novas vivendas.

PORTAS AVANZA DE FORMA SOSTIBLE E ORDENADA CARA AO SEU FUTURO.

O alcalde de Portas, Ricardo Martínez, supervisou esta mañá o remate das obras de substitución da herba sintética do campo de fútbol municipal da Rapeira que permitirán aos equipos do municipio de dispoñer dunhas instalacións deportivas de última xeración. Os primeiros en estrear o novo tapiz serán os nenos e nenas pertencentes ás categorías inferiores das escolas de fútbol do Portas e do Romai que estes días realizarán os seus adestramentos neste novo terreo de xogo.

A obra, que conta co financiamento do Plan Concellos da Deputación, saiu a licitación cun orzamento de partida de 170.146,82 euros e foi adxudicada cun aforro de 13.526,67 euros á empresa Obras y Pavimentos Especiales, S.A. ao resultar a oferta que obtivo a mellor puntuación por ser a máis vantaxosa.

Martínez amosou a súa satisfacción porque estean xa rematadas estas obras e manifestou que “deste xeito teremos o campo listo para a práctica deportiva no caso de que as novas condicións sanitarias permitan o seu uso en toda a súa plenitude y si se recuperan as competicións ligueras nas distintas categorías, agora interrumpidas polas restriccións impostas polas autoridades sanitarias na loita contra a pandemia da Covid-19”.

O alcalde sinalou tamén que “deste xeito o Goberno local cumpre así co compromiso de renovar estas instalacións deportivas que tiñan xa completamente esgotada a súa vida útil despois de tanto tempo de intensa actividade. Seguiremos pola senda de facer realidade todos e cada un dos compromisos que fumos asumindo ante a veciñanza e, pese ás dificultades do periodo polo que estamos a pasar, seguro que cumpriremos con todo o mundo”, asegurou Ricardo Martínez.

Este novo tapiz instalado no campo de fútbol, que conta co selo de calidade  FIFA e da Federación Internacional de Hockey, terá unha maior duración ao estar fabricado cos criterios da terceira xeración de céspede artificial, baseada na utilización de fibras de  monofilamento de polietileno, sección diamante, resistente ao raios U.V. e cun espesor de 410 micras.

A base primaria botouse dobre con 100% de PP Thioba, cor negra, estabilizado á acción de raios U.V. e de peso aproximado de 252 gramos por metro cadrado. Pola súa banda, a base secundaria levou un composto de látex con base de estireno-butadieno (SBR) con orificios de drenaxe. Este novo material implica moita menos abrasión que o  polipropileno que se utilizaba ata o de agora.

As obras consistiron no tratamento previo do terreo e a colocación dos 6.968 metros cadrados (104×67 metros) da nova alfombra, previa aplicación de area de  sílice e, finalmente, a repartición de caucho no céspede.

A Asociación Cultural e Deportiva Domingo Fontán celebrou cunha ofrenda floral no monumento do insigne xeógrafo e matemático de Portas para lembrar o 233º Aniversario do seu nacemento no que participou a presidenta da entidade, Concha Méndez Domínguez, e o alcalde Ricardo Martínez, o tenente de alcalde, Alfonso Vázquez, a concelleira Ana María Peña e o ex rexedor Víctor Estévez.

Os participantes nesta homenaxe comezaron o acto cunha concentración no Museo Domingo Fontán e, en comitiva, acompañada polo grupo de gaitas de nome homónimo, foron avanzando ata chegar aos xardíns da Praza de Domingo Fontán onde está ubicada unha estatua na honra deste destacado veciño da Ilustración española.

No momento en que chegou a comitiva uníuselles a ela a presidenta da Asociación Cultural e Deportiva Domingo Fontán, Concha Méndez Domínguez, quen acompañou ao alcalde, Ricardo Martínez, na realización da ofrenda floral diante do recordo pétreo en memoria do insigne matemático galego do século XIX.

Unha vez alí, o grupo de gaitas Domingo Fontán, de Portas, interpretou o himno galego que foi seguido con solemnidade polos presentes nun acto emotivo e sinxelo marcado polas restricións obrigadas pola pandemia da Covid-19. Así, os asistentes gardaron o distanciamento social e ían todos provistos de máscaras.

Ao rematar o acto o alcalde, Ricardo Martínez, departeu con varios membros da asociación presentes no acto e ensalzou a figura de Domingo Fontán como a máis senlleira de Portas e o matemático e xeógrafo máis importante na historia de Galicia.

O Concello de Portas decidiu cancelar os actos para honrar a San Pedro Mártir, previstos para o vindeiro sábado 24 de abril, ante as medidas preventivas sanitarias marcadas por mor da Covid-19 que fan imposible manter esta tradicional celebración anual.

Aínda así, o Concello de Portas manterá a capela aberta ao público todo o sábado desde as 10 da mañá ata as 19 horas (sete da tarde) cun aforo limitado a tan so 5 persoas, como máximo, co fin de manter as medidas de prevención impostas por mor da pandemia.

A capela de San Pedro Mártir, ubicada na parroquia de Lantaño, só se abre ao público a derradeira fin de semana do mes de abril para honrar ao seu patrón, engalanándose o Cruceiro do Culebrón (un dos máis curiosos e vistosos da comarca que posúe representado unha enorme figura dunha serpe enroscada no fuste desta cruz de pedra) cunha coroa de millo para pedirlle unha boa colleita ao santo.

Este templo relixioso é de propiedade municipal desde o 7 de abril do ano 1995 en que foi doado ao patrimonio do Concello de Portas polos señores Gándara Gómez e Remedios Junquera Gómez, herdeiros da familia Buceta Quintáns, e é a admistración local a encargada de garantir o seu mantemento e conservación.