José Manuel Fariña Jamardo, profesor de Historia da Arte do IES Aquis Celenis de Caldas de Reis, reivindicou a necesidade de incluir no proxecto curricular do ensino en Galicia a figura do insigne cartógrafo e matemático Domingo Fontán na lectura do pregón que pronunciou na Casa da Cultura con motivo da homenaxe que a Asociación Cultural e Deportiva Domingo Fontán e o Concello de Portas rendiron ao insigne xeógrafo no 236º aniversario do seu nacemento no lugar da Porta do Conde.

Fariña Jamardo foi recibido na Casa de Cultura da Porta do Conde polo alcalde de Portas, Ricardo Martínez; as concelleiras Ana Peña e Chus Fontán; a presidenta da Asociación Cultural e Deportiva Domingo Fontán, Concha Méndez, e membros do Grupo de Gaitas deste recoñecido colectivo cultural.

Durante a súa intervención ante o numeroso público que enchía o salón de actos da Casa de Cultura, Fariña Jamardo confesou sentirse atraído desde sempre pola figura deste ilustrado do século XIX e sostivo que era moi necesario para a Galicia actual e as xeracións futuras coñecer o alcance do pensamento e a obra de Domingo Fontán como unha das figuras máis poliédricas na historia da nosa Comunidade Autónoma e cuxos restos repousan no Panteón de Galegos Ilustres, en San Domingos de Bonaval, xunto a persoeiros tan senlleiros como Rosalía de Castro, Alfredo Brañas, Ramón Cabanillas, Castelao e Francisco Asorei.

No transcurso da súa alocución foi diseccionando e introducindo ao público na vida e obra dun home único, adiantado ao seu tempo e que despois de 17 anos de medicións e percorrido por todo o territorio galego foi quen de debuxar a primeira Carta Xeométrica de Galicia, deseñar as principais vías de comunicación da Comunidade Autónoma e mesmo proxectar a primeira liña de ferrocarril en Galicia entre Carril e Santiago de Compostela.

A continuación, Juan Manuel Fariña, representantes da Asociación Cultural e Deportiva Domingo Fontán, o alcalde de Portas, Ricardo Martínez, así como membros da Corporación Municipal, emprenderon a marcha desde a Casa da Cultura ata o monumento dedicado a Domingo Fontán para depositar unha coroa de flores diante da efíxe pétrea do insigne cartógrafo e matemático. A ese acto sumouse a presidenta da Asociación, Concha Méndez, quen foi a encargada de facer a ofrenda floral xunto a súa filla e ao alcalde.

Finalmente, o Grupo de Gaitas Domingo Fontán de Portas interpretou o himno de Galicia na honra do insigne ilustrado para dar por concluída a homenaxe tributada polo pobo de Portas que mantén vivo na súa memoria ao matemático, político e cartógrafo.

A choiva concedeulle unha tregua aos veciños e veciñas de Lantaño (Portas) para que poideran honrar a San Pedro Mártir concurrida procesión entre os cruceiros do Culebrón e de Paredes, á que acudiron o alcalde, Ricardo Martínez, e varios membros do equipo de goberno, así como a Banda de Música Unión de Lantaño.

Unha vez rematada a Misa Solemne, a procesión partiu desde a Capela de San Pedro Mártir, aproveitando que a choiva escampara, para que os veciños foran ocupando os seus postos nas ringleiras para acompañar ás imaxes do santo, o Nazareno e a Virxe das Dores no percorrido desde o cruceiro do Culebrón ata o de Paredes onde os devotos deron a volta acompañados pola Banda de Música Unión de Lantaño ata concluir de novo fronte ao templo relixioso.

Tras finalizar a procesión,  a Banda de Música Unión de Lantaño amenizou a xornada cun concerto con pezas moi coñecidas do seu habitual repertorio que os membros desta agrupación musical interpretaron á perfeccion. A continuación, e como marca a tradición, os asistentes compartiron un aperitivo a base de empanada e polbo á feira que correu por conta do Concello, tal e como se recolle no acordo de cesión da Capela que obriga á autoridade municipal a homenaxear a San Pedro Mártir cunha misa e unha festa na honra do Santo para toda a veciñanza.

UNHA CAPELA DE PROPIEDADE MUNICIPAL

Así, esta celebración se enmarca dentro do acordo de doazón da capela de San Pedro Mártir ao Concello de Portas feita polos señores Gándara Gómez e Remedios Junquera Gómez, herdeiros da familia Buceta Quintáns, mediante o cal o templo pasaba á propiedade municipal estando obrigado a administración local a promover un acto destas características na honra de San Pedro Mártir.

O Concello de Portas conmemora o 236º aniversario do nacemento de Domingo Fontán este domingo 28 de abril ás 12 do mediodía na Casa de Cultura da Porta do Conde coa lectura dun pregón a cargo de José Manuel Fariña, profesor de Historia da Arte no IES Aquis Celenis e unha ofrenda floral no monumento ao xeógrafo e ilustrado galego. Para rematar o acto, o Grupo de Gaitas Domingo Fontán de Portas interpretará o himno galego.

A deputada de Infraestruturas Públicas, Mobilidade e Contratación, Isabel Couselo, acaba de visitar en Portas o estado de execución das obras na EP-8004 Caldas-Vilanoviña, nas que a institución provincial está a investir preto dun millón de euros. Na súa visita, percorreu xunto co alcalde, Ricardo Martínez, un tramo no que se están a desenvolver as obras de renovación do firme e de mellora da seguridade viaria.

As obras contemplan a reparación da estrada, mediante a execución de saneos e fresado da capa de rodadura existente. Ademais, estase a proceder a aplicar un tratamento superficial e a repoñer o firme existente mediante a extensión dunha capa de formigón bituminoso en quente.Tamén contemplan a execución de pasos de peóns sobreelevados e a reposición de sinalización horizontal e vertical, co fin de salvagardar a debida prestación do servizo público e de mellorar a seguridade viaria.