Os concellos de Cuntis, Caldas de Reis, Barro, Moraña e Portas van poñer en marcha un novo Programa Integrado de Emprego cofinanciado pola Xunta de Galicia e o Servizo Público de Emprego Estatal. Nos proxectos precedentes conseguiuse unha alta porcentaxe de colocación das persoas participantes no programa.

As persoas que poden participar son aquelas que sexan demandantes de emprego e que estean empadroadas nalgún dos cinco concellos mencionados e que pertenzan aos colectivos aos que vai orientado o programa.

Dentro das accións previstas vanse a levar a cabo diferentes cursos, así como prácticas en empresas da comarca. Todas as persoas inscritas no programa percibirán unha axuda de 7 euros/ día pola súa asistencia ás diferentes actividades nas que participen. Tamén se contempla a posibilidade de sufragar servizos de gardaría para aquelas persoas que teñan fillos ao cargo, para facilitarlles a súa participación no programa.

Todas as persoas interesadas poden poñerse en contacto nos teléfonos dos concellos. O de Portas é o 986 53 69 25.