A Corporación Municipal do Concello de Portas aprobou cos votos favorables do PPdeG os Orzamentos Municipais para o presente ano que acada a cifra de 1.890.814,63 euros e que afrontan con realismo os desafíos da nova realidade marcada polo aumento da demanda en servizos sociais, a suba da tarifa enerxética, combustibles, subministros, etc.

Momentos antes de iniciarse o Pleno, a Corporación Municipal aprobou por unanimidade unha declaración institucional de concena sen paliativos do presunto homicidio perpretado contra Jéssica Méndez Iglesias e de apoio incondicional á familia da vítima do lamentable suceso ocurrido hai escasos días.

A maior parte do orzamento, o 87,75% do mesmo está asignado a atender o pago das nóminas do persoal municipal e dos gastos correntes e subministros o que limita en gran medida a capacidade investidora do Concello que ten que recurrir á xestión do equipo de goberno para lograr financiación doutras administracións, como Xunta e Deputación para poñer en marcha proxectos de especial interese para o municipio.

APOIO Á ASOCIACIÓNS E ATENCIÓN AOS SERVIZOS SOCIAIS

A maior aposta do equipo de goberno nos orzamentos municipais céntrase en atender as demandas da veciñanza en materia de servizos sociais, atención no fogar, axudas ao estudio, transporte escolar, ludotecas, finaciamento da escola infantil e subvencións ás asociacións sen ánino de lucro.

O capítulo de obras acometidas con fondos propios, o Orzamento Municipal reserva uns 100.428 euros (o 5,3% do total) que irá destinado a atender as principais demandas que a veciñanza ten en materia de arranxo de estradas, camiños, viais, etc.

Outra partida que se ve incrementada este ano é a destinada á recollida selectiva do lixo como un dos principais compromisos medioambientais que ten asumido o equipo de goberno nesta lexislatura e que está avanzando en combinación con outras iniciativas tendentes ao aforro enerxético e aos compromisos de redución do impacto da pegada de carbono.

APROBADA A PRIMEIRA RPT NA HISTORIA DO CONCELLO

Finalmente, a Corporación aprobou por unanimidade a Relación de Postos de Traballo (RPT), a primeira que se realiza na historia do Concello e que tamén contou co apoio de 11 dos 13 traballadores municipais nunha votación feita para coñecer o seu nivel de aceptación entre a plantilla.

Ricardo Martínez manifestou a súa satisfacción pola aprobación destes orzamentos que cualificou de “realistas, eficaces e eficientes e que responden ás necesidades da veciñanza dentro do equilibro orzamentario e as posibilidades de tesourería que manexa o noso Concello sempre co obxectivo de manter todos e cada un dos servizos á cidadanía sen renunciar a mellorar a prestación dos mesmos e sen que entre en risco de solvencia a economía municipal”, indicou o alcalde.

Durante o mes de marzo, o Concello de Portas conmemorou o día Internacional da Muller (8 de Marzo) cunha campaña de visualización das mulleres do noso municipio, ao abeiro das medidas sinaladas no Pacto de Estado contra a violencia de xénero, financiado con cargo aos créditos recibidos do Ministerio de Igualdade, Secretaría do Estado de Igualdade e contra a violencia de xénero.

Dita campaña consistiu na publicación de 14 entrevistas ao longo de todo o mes, a través da cal se quixo visualizar o papel de cada unha das mulleres participantes en distintos ámbitos da súa vida persoal, familiar, laboral … tendo en conta as súas vivencias e experiencias en función da época vivida.

Dende o Concello de Portas somos conscientes que non son as únicas mulleres, pero si poden representan a cada unha delas, que cada día da súa vida, loitan e se esforzan por lograr un futuro mellor, libre de todo tipo de violencia de xénero e con igualdade de oportunidades e dereitos.Damos as grazas a todas estas mulleres polo seu esforzo e loita.

María Elisa Abalo Méndez, de 81 anos, é pintora autodidacta e vive na parroquia de Lantaño. Nai de catro fillos/as e viúva moi nova, destaca a súa vocación pola familia. Elisa é unha muller afable e próxima con toda a veciñanza de Portas e sobre todo destaca o cariño que lle ten ao seu alumnado, tanto maiores como crianzas aos que imparte clases de pintura.

Pamplona, Santiago, Vilagarcía de Arousa, Zurich son lugares do mundo onde viviu e tamén expuxo a súa obra pictórica. Recordar os anos de nenez e a xuventude, respirar aire puro e o reencontro coa veciñanza considera que é o mellor de residir en Portas.

Para Elisa, ser muller é un privilexio e sobre todo destaca como regalo vital a capacidade de vivir a maternidade. Esta temática está moi presente nas súas obras pictóricas. O peor de ser muller di que pode ser unha vida moi sacrificada e con moitos traballos.

Asegura que foi unha muller que si sufriu discriminación laboral. Normalmente é máis difícil escalar e promocionar no mundo laboral ao ser muller, aínda hoxe seguimos a estar menos valoradas. Aconsella ás mulleres de Portas que sexan decididas e valentes.

Ás mozas que inician á súa vida laboral recoméndalles que sexan responsables e non esquezan defender sempre a outras mulleres ou compañeiras. Pide que se establezan máis axudas para as mulleres e que así poidan desenvolver mellor a súa vida laboral e os seus proxectos de futuro.

Nos seus plans a curto prazo figura o desexo de que algunha institución ou administración coñeza a súa obra sobre o Camiño de Santiago, pretende posicionarse nas redes sociais e organizar unha exposición virtual das súas obras.

#MulleresdePortas#8M#Empoderamento#PactodeEstado

O alcalde de Portas, Ricardo Martínez, acompañado polos tenente de alcalde Alfonso Vázquez e a concelleira Ana Peña achegouse ata o campo de fútbol da Rapeira, convertido en capital do fútbol base na contorna, para contemplar as evolucións do Torneo Biberón organizado pola Cultural Deportiva de Portas, que preside Manuel Fraga Estévez.Nesta edición do torneo participaron un total de 16 equipos da contorna entre os que están, ademais dos anfitrións do Portas, o Verdugo, Alondras, Atlético Cuntis, Barro, Caldas, Beluso, Portonovo, San Martín, U.S.D. Grove e Vilalonga.

Esta actividade concitou a presenza dun grande número de público ademais dos cativos participantes o que provocarán un dinamismo en Portas xerado pola actividade deportiva que achegará ata o municipio a veciños da contorna e do propio concello.Ricardo Martínez felicitou aos organizadores de evento e manifestou a súa satisfacción porque Portas estea dando un exemplo proactivo na posta en marcha de iniciativas de carácter deportivo que fomenten hábitos saudabres entre a mocidade ou, como neste caso, os cativos de curta idade.“

Para nós é fundamental o fomento da práctica deportiva entre os nosos cativos porque ademais de ser un aliciente lúdico aprenden valores de socialización como o compañerismo, a importancia de compartir, do esforzo, da búsqueda de obxectivos comúns e, sobre todo, de divertirse”, indicou o alcalde Ricardo Martínez.

O alcalde de Portas, Ricardo Martínez, acompañado polo tenente de alcalde Alfonso Vázquez e os concelleiros Ana Peña e Víctor Estévez, inaugurou esta mañá o Parquing Municipal de Autocaravanas, cualificado polos máis de 200 autocaravanistas presentes como o de maior capacidade e superficie dos existentes en Galicia.

O acto contou tamén coa presenza do presidente da Asociación Galega de Autocaravanas, Manuel Fernández-Arruti que aproveitaron a ocasión para celebrar unha asemblea da entidade e realizar unha serie de actividades lúdicas e turísticas polo concello de Portas entre as que destacan a visita a dúas adegas, un paseo pola Vía Verde e varias saídas por rutas de sendeirismo do concello.

Durante o acto de inauguración, Fernández-Arruti agradeceu ao alcalde de Portas, Ricardo Martínez, a “aposta clara e decidida do Concello por este tipo de turismo cunhas instalacións e un espazo moi interesante e agradable para albergar a visita de autocaravanas, con todo tipo de servizos e moi ben ubicado”.

Pola súa banda, o alcalde Ricardo Martínez deulle a benvida aos máis de 200 autocaravanistas presentes neste acto e animounos a descubrir as marabillas e os atractivos turísticos de Portas e defendeu estas instalacións como “ideais pola súa ubicación para ser base de “lanzamento” para realizar todo tipo de visitas xa que está ubicado en pleno Camiño de Santiago, a un saltiño da ría de Arousa, das comarcas do Ulla-Umia e mesmo da Barbanza e Pontevedra. Ademais temos en Portas mil e unha ofertas turísticas por descubrir que van desde o turismo enolóxico ás adegas, como xa ides a coñecer hoxe, ata a visita ao rico patrimonio arquitectónico civil e relixioso con pazos, igrexas, cruceiros, petos de ánimas, pontes medievais, etc. Sen esquecer a magnífica Azucreira onde estamos e a Vía Verde, que pivota sobre Portas como eixo fundamental, tanto a existente cara Vilagarcía como a que se pretende crear ata Pontevedra”, indicou o alcalde.

MÁIS DE 200 PERSOAS APUNTADAS PARA A VISTA ÁS ADEGAS

A inauguración destas instalacións municipais permite aos membros da Asociación Galega de Autocaravanas coñecer en profundidade os atractivos turísticos e etnográficos do concello de Portas e así os asistentes a este acto visitaron a Adega Viña Cartín “Terras de Lantaño” e Viña Almirante. Tivéronno que facer por quendas xa que anotáronse máis de 200 persoas pertencentes a este colectivo de autocaravanistas.

Pola tarde, os participantes neste evento visitaron a Azucreira de Portas, lugar escollido pola organización para celebrar a Asemblea Xeral Ordinaria deste colectivo na que participarán membros vidos de toda Galicia.

A xornada do domigo 27 de marzo estará reservada ao paseo e ao coñecemento da Vía Verde, no tramo comprendido entre Portas e Caldas de Reis que se fará, no sentido de ida pola estación e volverase polo río. Este roteiro ten unha concepción circular e unha dificultade moderada sobre unha distancia que non chega aos 9 quilómetros.

Sonia Vázquez Carballo é veciña de Portas onde vive hai 38 anos. Medrou nunha familia adicada xeración tras xeración ao comercio da alimentación. Tomou o relevo xeracional e segue a exercer como autónoma na coñecida Tenda de Alimentación Sonia.

É unha muller afeccionada á xardinería pero tamén nos comenta que lle gusta moito a cociña e a repostería. Considérase unha muller de carácter máis ben serio, respectuosa coas persoas e veciñanza e tamén moi próxima no trato persoal.

Preguntada pola súa opinión sobre o concello de Portas, Sonia destaca a súa tranquilidade, a calma, un lugar onde non acontecen altercados na vida diaria son cualidades que destaca do seu pobo. Para Sonia o mellor de ser muller é poder ser nai, e non atopa ningunha connotación negativa en ser muller.

Dende que comezou a súa andaina laboral nunca se enfrontou a discriminación laboral por ser muller. Aconsella ás mulleres que comezan a traballar que sexan disciplinadas, que traballen no que lles gusta con moitas gañas e sempre con afán de superación dentro do desempeño do seu labor.

No seu futuro próximo desexa mellorar dirixíndose máis cara ao ramo da alimentación, nestas ideas de futuro está a traballar e vai continuar medrando xunto co Agro de Portas no que tamén traballa conxuntamente co seu marido.

#MulleresdePortas#8M#Empoderamento#PactodeEstado

O alcalde de Portas, Ricardo Martínez, acaba de editar un Bando Municipal advertindo da prohibición de botar residuos non permitidos nos contedores de lixo. Desde hai algún tempo que se veñen detectando na recollida do lixo de residuos non permitidos como entullos de obra, pneumáticos, etc. O mesmo sucede con restos de poda, maleza e broza que tampouco están autorizados.

O Concello de Portas lembra que ten a disposición da veciñanza dun servizo de recollida de voluminosos a domicilio (previa chamada telefónica) polo que non se entende que sigan aparecendo mobles, colchóns, sofás, etc. ao carón dos colectores de lixo.

Por todo isto, o Concello de Portas solicita a colaboración veciñal para un uso correcto do sistema de recollida de lixo.

Sara Vázquez Aldrey ten 27 anos e sempre viviu no concello de Portas onde desenvolve a súa profesión de adestradora de Fútbol. Dentro da súa preparación académica destaca o Máster especialista en fútbol pola Federación Española e a Universidade Rey Juan Carlos I de Madrid.

Entre as súas afeccións indica que lle gusta ler e viaxar, conxugando estas actividades coa práctica doutros deportes. Sara ten múltiples habilidades, entre elas destaca que é unha muller moi sociable, alegre e constante, pois non para ata conseguir as súas metas, “si ou si, chégase”.

Segundo considera Sara, o mellor de residir en Portas é a facilidade nas comunicacións, a proximidade coa xente e o coñecerse todas e todos. Para esta veciña de Portas ser muller ten todo de bo. As mulleres demostran cada día que en todas as facetas somos iguais aos homes e que o importante é o coñecemento, o desempeño do traballo e a calidade persoal. O peor de ser muller para Sara é que en algunhas ocasións as mulleres non son suficientemente valoradas aínda hoxe en día.

Indica que moitas veces, demasiadas, enfrontouse á discriminación laboral, incluso xa nas etapas formativas. “Se ti queres, podes” é o consello que dá ás mulleres para acadar a igualdade entre mulleres e homes. Asegura que as mulleres deben loitar polo que queren e que deben impedir que nunca nada as pare.

Ás mulleres que comezan a súa vida laboral recoméndalles que non teñan medo a nada, e que si o teñen, non oculten o sufrimento porque si hai que chorar, chórase. Suxírelles que teñan presentes como referentes ás súas nais e avoas, que tanto loitaron, e que como ela cheguen e amosen que o xénero non é todo.

Nos plans futuros de Sara está acadar adestrar a un equipo de fútbol masculino de Primeira División.

#MulleresdePortas#8M#Empoderamento#PactodeEstado

Concepción Méndez Domínguez “Concha” é mestra nacional, máis exerceu como ama de casa e incluso ás veces de enfermeira. Esta veciña de Portas tamén viviu en Santiago de Compostela e Vigo. Entre as súas afeccións, que non son poucas, podemos destacar: ler, a costura, o teatro, o entroido, cantar, xogar ao fútbol e ensinar o catecismo.

En Concha destaca a súa capacidade de empatía e a inquietude que mantén con máis de 80 anos. Ela sempre percorría Lantaño en vespino, bicicleta ou a pé, coñecendo cada recuncho e sentindo a liberdade de vivir neste concello.

Para ela ser muller é ter a capacidade de sacrificio e de entrega. O peor da experiencia vital dunha muller é sufrir a invisibilidade e a indiferenza polo solo motivo do noso xénero. Concha é unha muller do pobo e neta da primeira alcaldesa galega. Foi nomeada Alcaldesa de Honra na I Festa da Dona o 29 de maio do 2016 por unanimidade a través das distintas asociación do concello de Portas.

Dende cativa, Concha viviu a experiencia da igualdade entre mulleres e homes dentro da súa familia. Aconsella que hai que situar no mesmo plano a mulleres e homes. Tamén di que a formación, o bo carácter, respectar e respectarse, amor ao traballo,… deben ser a folla de ruta, o diario de abordo de toda muller que accede ao mundo laboral.

Considérase amiga dos seus amigos “porque as amizades elíxoas eu e á familia dánola Deus”. Atesoura fermosas vivencias nas que sen pretendelo foi a líder das mozas do seu tempo. A perda do seu fillo e do seu pai fixo efecto nela, máis da súa forza e da súa actividade renaceu unha muller valente.

Concha ten sempre un sorriso para toda a veciñanza e destaca nela que é unha muller moi actual e moderna. Hoxe en día segue aprendendo e posicionándose nas redes sociais. Outras das súas tarefas hoxe en día é ser a mestra das súas netas.

#MulleresdePortas#8M#Empoderamento#PactodeEstado

María del Mar González Loureiro é unha veciña de Portas de 37 anos nada en San Sebastián. A súa profesión é a de cantante e compositora, liderando actualmente o grupo de Folk Contemporáneo Celta “Ancestros”. Mar xa leva moitos anos vivindo en Lantaño. Destaca que cada día desfruta moito a tranquilidade do rural, pois asegura que é un luxo que non ten prezo.

Dentro da súa traxectoria laboral previa á esta etapa comenta que traballou como teleoperadora e na hostalería. Pero o que move a Mar dende sempre é a súa afección a cantar e a escribir. Saber escoitar, traballar en equipo e ser boa observadora son habilidades que destacan en Mar.

Considera que o mellor de ser muller é ter a capacidade de atopar recursos resolutivos en diversas situacións empregando a empatía e a sensibilidade. “Isto é unha capacidade que temos as mulleres pese aos muros, límites e prexuizos cos que nos atopamos ás veces, para acadar o éxito no emprendemento feminino”, asegura.

“Non consintas que os necios fagan cautiva a túa voz” forma parte da letra dunha das súas cancións e a súa proclama para a igualdade entre mulleres e homes.

Mar suxire que engadindo espírito de sacrificio e crendo en nós mesmas poderemos loitar polas nosas metas. Enfocar o teu destino cara ó que che fai sentir ben é determinante para ser boa profesional e, tamén é preciso esquecer as afirmacións negativas que che puideran facer os demais.

Os seus plans próximos consisten en posicionar ao grupo musical Ancestros transmitindo os valores da cultura e as crenzas do noso pobo, para isto precisa o apoio e a aposta decidida das institucións. Outro plan de futuro a longo prazo é poder publicar o seu libro.

Convida á veciñanza de Portas a descubrir o grupo de Folk Contemporáneo Celta Ancestros e sobre todo recomenda que sexan “persoas emprendedoras de soños sen prexuízos”.

#MulleresdePortas#8M#Empoderamento#PactodeEstado