O Concello de Portas acaba de chegar a un acordo coa organización de “PortAmérica” que permitirá que os mozos e mozas empadroados no municipio de entre 16 e 30 anos de idade que desexen acceder aos concertos dos días 2, 3 e 4 de xuño poidan facelo de xeito gratuíto.

Os interesados poderán retirar os seus tíckets nominais nas oficinas municipais, dentro duns días previa comunicación pública na web e nas redes sociais oficiais do Concello, unha vez que se comprobe a súa identidade e se vexa que están realmente empadroados en Portas.

O tramo de idades dos beneficiarios reflicte os mesmos do carné xove, ca salvedade que se parte dos dezaseis anos, xa que para poder acceder ao recinto, o poderán facer sen a necesidade de ir acompañados dun adulto, aínda que non se lles servirán bebidas alcohólicas, e precisarán dunha autorización do seu responsable legal.

O equipo de goberno ten detectado o grande interese amosado pola mocidade en asistir aos concertos programados por “PortAmérica”.

“PORT AMÉRICA”, UN ACONTECEMENTE MOI ESPERADO POLA MOCIDADE

O Concello de Portas fará un esforzo económico para que as mozas e mozos do municipio desfruten do festival musical “PortAmérica”. Deste xeito pretenden compensalos, polo seu exemplar comportamento cívico durante estes dous longos anos de pandemia, e así poidan asistir ao festival, totalmente gratis. As mozas e mozos que queiran dispoñer dunha entrada nominativa deberán achegarse debidamente identificados ata as oficinas do Concello e retirar a correspondente invitación no momento que se abra o proceso, que se fará dun xeito ordenado proximamente e se dará aviso á veciñanza.

Unha nutrida procesión entre os cruceiros do Culebrón e de Paredes serviu para honrar a San Pedro Martír e recuperar a normalidade da vida social, cultural e relixiosa en Lantaño (Portas) despois do parón imposto pola pandemia da Covid-19.

Despois da misa solemne, tivo lugar a procesión na que participou o alcalde, Ricardo Martínez, e varios membros da Corporación Municipal que acompañaron ás imaxes no percorrido que, partindo desde a capela de San Pedro Mártir e o cruceiro do Culebrón, se dirixiu ata o de Paredes onde os devotos deron a volta acompañados pola Banda de Música Unión de Lantaño ata concluir de novo fronte ao templo relixioso.

A continuación a Banda de Música Unión de Lantaño amenizou a xornada cun concerto mentras se procedía a repartir entre os asistentes un aperitivo que foi compartido polos numerosos veciños da parroquia que se deron cita neste lugar.

UNHA CAPELA MUNICIPAL

Esta celebración se enmarca dentro do acordo de doazón da capela de San Pedro Mártir ao Concello de Portas feita polos señores Gándara Gómez e Remedios Junquera Gómez, herdeiros da familia Buceta Quintáns.

A celebración rematará esta tarde, a partir das 20 horas, cando terá lugar a actuación do grupo musical Vilamariachi no Centro Cultural Candelas de Lantaño.

Os veciños de Lantaño honrarán este sábado 30 de abril ao seu patrón, San Pedro Mártir, avogado das colleitas e da reuma, recuperando as celebracións tradicionais entre as que destacan a procesión entre os cruceiros do Culebrón e de Paredes que terá lugar despois da misa das 13 horas.

Despois da tradicional procesión terá lugar un concerto amenizado pola Banda de Música Unión de Lantaño e, a continuación, procederase a degustar uns aperitivos gratuítos para todos os asistentes.

Pola tarde, a partir das 20 horas, terá lugar a actuación do grupo musical Vilamariachi no Centro Cultural Candelas de Lantaño, en caso de que haxa choiva a actuación celebrarase no Auditorio Municipal da Azucreira de Portas.

UN TEMPLO RELIXIOSO DE PROPIEDADE MUNICIPAL DESDE 1995

A capela de San Pedro Mártir, ubicada na parroquia de Lantaño, só se abre ao público a derradeira fin de semana do mes de abril para honrar ao seu patrón, engalanándose o Cruceiro do Culebrón (un dos máis curiosos e vistosos da comarca que posúe representado unha enorme figura dunha serpe enroscada no fuste desta cruz de pedra) cunha coroa de millo para pedirlle unha boa colleita ao santo.

Este templo relixioso é de propiedade municipal desde o 7 de abril do ano 1995 en que foi doado ao patrimonio do Concello de Portas polos señores Gándara Gómez e Remedios Junquera Gómez, herdeiros da familia Buceta Quintáns, e é a admistración local a encargada de garantir o seu mantemento e conservación.

Ao abeiro das medidas sinaladas no Pacto de Estado contra a Violencia de Xénero, financiado con cargo aos créditos recibidos do Ministerio de Igualdade, Secretaría do Estado de Igualdade e contra a Violencia de Xénero, o Concello de Portas organiza o obradoiro de Alfabetización Dixital dirixido á poboación maior de 55 anos durante o mes de maio.

O obxectivo principal é que as persoas participantes poidan adquirir as habilidades necesarias para obter competencias nas xestións cotiás da vida diaria a través das novas tecnoloxías, cos obxectivos de incrementar o seu empoderamento, autoestima, satisfacción en igualdade de oportunidades e desenrolo da socialización das persoas.

ANÍMATE A PARTICIPAR!!!!

PRAZO ATA O 26 DE ABRIL

A música da famosa gaiteira galega Susana Seivane serviu de introdución á ofrenda floral promovida pola Asociación Cultural e Deportiva Domingo Fontán e o Concello de Portas para conmemorar o 234º aniversario do nacemento do insigne xeógrafo e matemático que se realizou na Porta do Conde diante do monumento ao cartógrafo galego.

O acto contou coa presenza do alcalde, Ricardo Martínez, a presidenta da Asociación Cultural e Deportiva Domingo Fontán, Concha Méndez Domínguez, así como a concelleira Ana Peña e veciños que acompañaron aos asistentes neste acto de homenaxe á figura do insigne cartógrafo.

O evento iniciouse coa intervención do alcalde de Portas, Ricardo Martínez, quen ensalzou a figura de Domingo Fontán, un ilustrado nacido en Porta do Conde, “un veciño que desde un modesto municipio soubo poñer o seu coñecemento e a súa intelixencia ao servizo de Galicia e de España”.

Segundo dixo o alcalde, “sentímonos moi honrados, como veciños de Portas, de estar hoxe aquí recordando o 234 aniversario do nacemento de Domingo Fontán, unha persoa que foi exemplo de humildade, traballo e intelixencia. Domingo Fontán formou parte da ilustración española e foi quen de poñer, negro sobre branco, as liñas que definiron o perfil cartográfico de Galicia. Grazas a el España e Galicia entrou nun proceso de catalogación, ordenación e modernidade sen precedentes e a el debémoslle que Portas aparecera por primeira vez nun mapa científico de proporcións impresionantes”.

Ricardo Martínez abondou en dicir que “temos que sentírmonos orgullosos do noso pasado, do legado de Domingo Fontán e de tantas e tantas persoas que co seu traballo, co seu esforzo e coa súa sabedoría axudaron a que as cousas mudaran, que as cousas melloraran e que avanzara a nosa sociedade. Si hai uns días homenaxeabamos a aqueles músicos pioneiros que impulsaron as distintas bandas de música en Lantaño e no noso municipio, hoxe estamos aquí para honrar a memoria e reivindicar como parte do noso patrimonio a figura e a obra de Domingo Fontán”.

Seguidamente tomou a palabra a presidenta da Asociación Cultural e Deportiva Domingo Fontán, Concha Méndez Domínguez, quen salientou a importancia que o matemático ten para a historia de Portas e de Galicia e renovou o seu compromiso persoal e da asociación en seguir impulsando actividades que contribúan a “descubrir, divulgar e honrar a vida e o obra de don Domingo”.

A continuación, a gaiteira Susana Seivane interpretou un par de pezas en solitario para seguidamente, acompañada polos músicos do grupo de gaitas “Domingo Fontán” convidar ao público asistente a cantar e bailar cancións do folclore tradicional galego moi populares.

Antes de proceder a realizar a ofrenda floral, o alcalde agasallou a Susana Seivane e ao grupo de gaitas “Domingo Fontán” cun exemplar do libro de Juan Fernando Laguarta Badía, titulado “Banda de música de Lantaño”, recientemente presentado. A presidenta da Asociación, fíxolle entrega á gaiteira dun libro sobre a vida de Domingo Fontán. A concelleira Ana Peña agasallou á presidenta Concha Méndez cunha fotografía de gran tamaño que recollía a visita da Asociación ao Parlamento de Galicia.

Co depósito dunha coroa de loureiro aos pés do monumento a Domingo Fontán rematou o acto coa interpretación do himno galego a cargo da agrupación de gaitas que leva o nome do insigne cartógrafo.

A Asociación Cultural e Deportiva Domingo Fontán e o Concello de Portas homenaxearán este domingo 24 de abril a partir das 12 do mediodía á figura do matemático nado hai 234 anos en Porta do Conde cunha serie de actos entre os que destacan a actuación da gaiteira galega universal Susana Seivane e unha ofrenda floral diante do seu monumento.

Estes actos terán lugar na Casa de Cultura-Biblioteca Porta do Conde, en Portas e ademais das intervencións protocolarias en lembranza do ilustrado galego, interpretará o himno galego o Grupo de Gaitas Domingo Fontán de Portas.

A Xunta de Galicia, a través da Consellería de Infraestruturas e Mobilidade, vén de recoller as solicitudes de colaboración económica do Concello de Portas para as Estacións Depuradoras de Augas Residuais (EDAR) de Ponte Chaín e Romai. A conselleira Ethel Vázquez e o delegado territorial da Xunta en Pontevedra, Luis López, mantiveron un encontro de traballo sobre estas infraestruturas de augas no edificio administrativo de Campolongo co alcalde de Portas, Ricardo Martínez, que lles expuso a situación de ambas e solicitou cooperación para acometer as obras necesarias neste servizo de competencia municipal.

En concreto, o rexedor local explicou a necesidade de acometer certas reformas na EDAR de Ponte Chaín co obxectivo de acadar o seu óptimo funcionamento e a posibilidade de construír unha nova depuradora en Romai para ofrecer este servizo a esta parroquia e outros puntos da súa contorna.

Os representantes autonómicos valoraron positivamente o ánimo de colaboración do Concello de Portas, que xa está a xestionar a consecución dos terreos necesarios e a acometer a redacción dos proxectos, e analizarán nas vindeiras semanas as distintas opcións e prazos para tentar participar con financiamento nestas actuacións, tal e como se está a facer con decenas de concellos galegos.

A Xunta eliminou un punto de  vertido de augas residuais na parroquia de San Cristovo de Briallos, no concello de Portas, cara ao río Chaín.

Este foco foi localizado no marco das inspeccións rutineiras levadas a cabo polos técnicos do Plan de Control de Vertidos, dependente de Augas de Galicia.

Os inspectores desprazados á zona identificaron a orixe do vertido nunha rede de evacuación de augas pluviais con conexións de augas residuais xeradas en varias vivendas da zona. Procederon á toma de mostras e a analítica amosou contaminación no punto inspeccionado.

Augas de Galicia notificoulle a situación ao Concello de Portas para que procedese a adoptar as medidas necesarias para emendar o foco contaminante.

Nunha nova inspección, os técnicos da Xunta verificaron que as actuacións realizadas polo Concello na zona permitiron o cese do foco e a emenda do vertido.

O Concello de Portas pon en marcha un obradoiro de alfabetización dixital ao abeiro das medidas sinaladas no Pacto de Estado contra a Violencia de Xénero, financiado con cargo aos créditos recibidos do Ministerio de Igualdade, Secretaría do Estado de Igualdade e contra a Violencia de Xénero.

Este obradoiro está dirixido á poboación maior de 55 anos e porase en funcionamento durante o mes de maio. O obxectivo principal desta iniciativa é que as persoas participantes poidan adquirir as habilidades necesarias para obter competencias nas xestións cotiás da vida diaria a través das novas tecnoloxías, cos obxectivos de incrementar o seu empoderamento, autoestima, satisfacción en igualdade de oportunidades e desenrolo da socialización das persoas.

O Auditorio da Azucreira de Portas acolleu a presentación do libro de Juan Fernando Laguarta Badía, “Banda de Música de Lantaño”, nun emotivo acto que contou coa presenza de numeroso público, do alcalde, Ricardo Martínez, o secretario xeral de Política Lingüística, Valentín García, o autor do traballo de investigación e recopilación e o editor José Luís Teófilo.

O acto comezou coa proxección dun vídeo preparado por Teófilo Edicións con imaxes da Banda de Música de Lantaño ao longo dos 150 anos de existencia e que serviron de introdución ao acto. Tomou a palabra José Luís Teófilo quen nun emotivo discurso lembrou a súa relación persoal durante a infancia coa súa nai cando percorrían xuntos no verán o concello de Portas e a parroquia de Lantaño e fixo un alegato na defensa da identidade dos pobos, da experiencia do pasado e reflexionou sobre a importancia de coñecelo para “saber de quen somos e de onde vimos” para trazar un exitoso futuro.

Teófilo confesou sentirse en Portas como na súa casa, en Vilaxoán, e destacou que este era o quinto traballo que realizaba tendo como protagonista a este territorio e así lembrou a biografía e a reprodución de mapas debuxados polo xeógrafo universal Domingo Fontán e mesmo anunciou que está a traballar na edición dun libro infantil ilustrado sobre a figura deste galego ilustrado universal. Rematou a súa intervención cun emocionado “viva Portas agora e sempre!”

Despois de interpretar unha peza a Banda Música Unión de Lantaño, tomou a palabra un emocionado Juan Fernando Laguarda Badía quen agradeceu á Xunta, Concello e a Teófilo Edicións o seu traballo e colaboración para que saíra á luz o traballo de investigación atesourado e recopilado durante toda unha vida e que comezou a raíz de que o autor do libro fora gardando infinidade de recortes de prensa das noticias que tiñan como protagonistas ás bandas de Lantaño.

Laguarta Badía, que prácticamente desde o berce mamou o amor pola música e por esta institución xa que o seu pai, José Laguarta, foi director da Banda Unión desde o ano 1944 ata 1976, desglosou a historia desta agrupación musical desde as súas orixes, a finais do século XIX, cando Ricardo Candán Fernández, “Candango”, fundou a primeira das bandas que viñeron funcionando en Lantaño e pasando por diversas vicisitudes ata confluir, na postguerra no que hoxe é a Banda de Música Unión de Lantaño.

No seu traballo recolle os 404 nomes dos músicos que ao longo do tempo estiveron ligados ás bandas dos Viñas, dos Pozas, Os Rebeldes ata chegar á Banda Unión. Rescatou para o numeroso público presente e para a memoria colectiva de Portas os nomes daqueles impulsores da música de banda e que desde Lantaño foron unha referencia para Galicia enteira. Falou de mestres da música como Ricardo Candán Fernández, “O Candango”; os Vilas (Eligio, Álvaro e Hermógenes), Amador Piñeiro Buceta, Os Poza, Fiúza, , ata chegar á fusión na Banda de Música Unión de Lantaño con Andrés Méndez, Bernardino Buceta e Nemesio Méndez e con Andrés Blanco “Rebornecho”, como o seu primeiro director.

Tamén fixo referencia moi emocionada ao periodo no que o seu pai, José Laguarta ocupou a dirección da Banda e que se prolongou entre os anos 1944 e 1976, con diversas fases, e que motivou o aplauso cariñoso de todo o auditorio.

Juan Fernando Laguarta falou tamén do extraordinario labor levado a cabo pola Banda de Lantaño como semilleiro de grandes músicos e compositores e así pediu un forte aplauso para un dos que estaba presentes, Eligio Vila, “un dos mellores compositores de Galicia e de toda España”. Tamén falou de Antonio Caldas, Adonis Ferreiro, Marcial Fontán, etc.

Contou varias anécdotas sobre a rivalidade e os enfrontamentos previos vividos entre as bandas dos Vilas e dos Pozas antes da ansiada consumación da “Unión” e tamén dos distintos concursos a nivel de toda Galicia aos que se presentaban e que contribuíron a darlle o gran nome e fama que esta Banda acadou en toda Galicia.

Finalizou a súa intervención agradecendo as mostras de cariño e pedindo unha forte aperta para Alejandro García Pacheco, o actual director da Banda de Música Unión de Lantaño, a quen agradeceu os seus esforzos por manter a continuidade da agrupación e do alto nivel dos seus compoñentes.

En actitude recíproca, Alejandro García agradeceu as ensinanzas e o legado que recibían os novos compoñentes da historia de 150 anos da Banda de Música Unión de Lantaño e obsequiou a Juan Laguarta co estreno dun pasodobre titulado “A D. José”, en homenaxe ao seu pai e ao mesmo autor deste libro que se presentou hoxe en Portas.

O acto concluíu coa intervención do secretario xeral de Política Lingüística da Xunta, Valentín García, e o alcalde de Portas, Ricardo Martínez, quen destacaron o labor e o amor que Juan Laguarta profesa desde sempre á música en xeral e á Banda de Lantaño en particular e agradeceron a súa memoria e o seu esforzo para publicar este traballo que formará parte das bibliotecas de conservatorios, centros educativos e será unha guía sobre a historia das bandas de música en toda Galicia.